​ Шинэ хоршоо хөдөлгөөнд хамрагдсан малчид улсын төсөвт 500 гаруй сая төгрөгийн татварын орлого төвлөрүүлсэн байна

Малчид орон нутагтаа, хотондоо үйлдвэрлэл эрхлэх боломжийг бий болгож, тогтмол орлоготой байх боломжийг бүрдүүлэхээр 2024 оноос эхлэн Шинэ хоршоо хөдөлгөөнийг эхлүүлсэн. Ийнхүү Шинэ хоршоо хөдөлгөөний хүрээнд нийт 800 гаруй тэрбум төгрөгийн зээлийг 329 сумын 6885 хоршооны 23,581 малчин, хоршоологчдод олгожээ. Өмнө нь зах зээл дээр зөвхөн жилийн 24 хувийн хүүтэй “Малчны зээл” авч байсан малчдад хөнгөлөлттэй нөхцөлийг бүрдүүлж, жилийн 6 хувийн хүүтэй, 50 сая хүртэлх төгрөгийн зээл авах боломж бий болгосон юм. Уг хөдөлгөөний хүрээнд олгогдож буй зээлүүд нь улсын төсвөөс бус, арилжааны банкуудын өөрийн хөрөнгөөс гарч байгаа бөгөөд малчид зээлээ нэг ч хоцролгүй, хугацаанд нь эргэн төлж эхэлжээ. Тодруулбал, 2025 оны 4-р сараас зээлдэгч малчид эргэн төлөлтөө эхлүүлсэн бөгөөд өнөөдрийн байдлаар нийт 20 тэрбум гаруй төгрөгийн зээлийг буцаан төлсөн байна.

Мөн 2024 оны байдлаар хоршоологчдын борлуулалтын орлого нийтдээ 402 тэрбум төгрөгт хүрч, Монгол Улсын төсөвт 500 гаруй сая төгрөгийн татварын орлого төвлөрүүлжээ.
Иймээс “Шинэ хоршоо хөдөлгөөн” нь төсвийн мөнгө үр дүнгүй зарцуулсан хөтөлбөр бус, малчдын хувийн хариуцлагад суурилсан, банкны зээлийн эх үүсвэртэй, санхүүгийн сахилга бат бүхий хөдөлгөөн болохыг бодит тоо баримт, үр дүн харуулж байна.