ЭМЯ: Иргэн 27-ны өдөр Уханиас ирсэн гэж байгаа ч тийм боломж байхгүй

Коронавирусын халдвар авсан байж болзошгүй тохиолдолд Орхон аймагт бүртгэгдэж,  сэжигтэй иргэнийг тусгаарлан, шинжилгээ авч, дээжийг ХӨСҮТ рүү илгээгээд байна. Тодруулбал, тус аймгийн "Мэндцэцэн" эмнэлэгт өнөөдөр 25 настай, эрэгтэй иргэн У халуурах шинж тэмдэгтэйгээр хандсан бөгөөд эмчийн асуумжид БНХАУ-ын Ухань хотод тээвэрлэлтийн ажил эрхлээд ирсэн хэмээсэн байна.

Тодруулбал, өнгөрсөн нэгдүгээр сарын 27-нд Ухань хотоос гарч, 31-ний өдөр Замын-ҮҮдийн боомтоор МУ-д нэвтэрсэн хэмээн хэлжээ. Гэхдээ 23-ны өдөр Ухань хотод хөл хорио тогтоосон тул 27-ны өдөр тус хотоос ирэх боломжгүй гэдгийг ЭМЯ-наас мэдээллээ. Одоогоор тухайн иргэний биеийн байдал хэвийн, халуун буусан гэдгийг мэдээлж байна.

Өвчний халдвар гарсан үеэс хойш БНХАУ-аас 6000 орчим хүн МУ-д орж ирсэн учир өвчин гарах өндөр эрсдэлтэй, тухай бүрд шинжилгээ хийж байгааг албаныхан мэдээллээ.