ОСЛЫН ГАЗАР АЖИЛЛАСАН ОНЦГОЙГИЙН ЗАРИМ АЛБАН ХААГЧДЫГ ӨНӨӨДӨР ШАГНАНА

Төв аймгийн Заамар сумын нутаг дэвсгэрт үйл ажиллагаа явууулдаг "ЭКО АЛТАН ЗААМАР" компанийн уурхайд хөрсний нуралт үүссэний улмаас дөрвөн ажилтан нурангид дарагдаж амь насаа алдсан.ОБЕГ-ын албан хаагчид ослын газарт есөн өдрийн турш хүнд нөхцөлд ажилласнаар осолдсон иргэдийн цогцсыг гаргаж, ар гэрийнхэнд нь хүлээлгэн өгсөн юм.Энэ тухай Шадар сайд Ө.Энхтүвшин "Онцгойгийн албан хаагчид үнэхээр хүнд нөхцөлд ажиллаж байгаа. Дахин нуранга үүсэх нөхцөлд байдалд ажиллаж байна" гэсэн байдаг.

Харин ослын газар ес хоногийн турш ажилласан аврагч З.Гүррагчаа "Шумбагчдын хувьд шороотой ус залгиж, шороотой усаар амьсгалж байсан. Нэг шумбагч ороод 30 минут шумбачихаад гараад ирэхээр дараагийн шумбагч нь нойтон хувцсыг нь сольж өмсөөд ордог. Дахиад хөрсний нуралт үүсч мэдэх эрсдэлтэй, том том мөс хөвсөн, үзэгдэх орчин огт байхгүй, маш их хүйтэн нөхцөлд ажилласан" хэмээн ярьсан юм.Тэгвэл ослын үеэр ажилласан ОБЕГ-ын ажилчдыг өнөөдөр Шадар сайд хүлээн авч уулзахаар болжээ. Ингэхдээ зарим албан хаагчдыг урамшуулж, шагнал гардуулах юм байна. Шагнал гардуулах үйл ажиллагаа 12.00 цагт Шадар сайдын өрөөнд болох аж