Н.Мандуул: Бодит судалгаанаас бодит үр дүн гарах тул эхний ээлжид дүүргийн 15 дугаар хороог бүрэн хэмжиж, дулаан алдагдлын дата цуглуулаад байна

Н.Мандуул: Байшингийн дулаан алдагдлыг шийдэх нь утааг бууруулах, зуухны хэрэглээг багасгах, ногоон шийдэл рүү шилжих үндсэн суурь нь буюу зоосны нэг тал. Чингэлтэй дүүргээс санаачлан хэрэгжүүлж байгаа иргэдийг сэдэлжүүлэх, гэр байшингаа үр дүнтэй дулаалахад нь зөвлөн туслах "Дулаалъя" аяны хүрээнд 15 дугаар хорооны 612 айл өрхийн дулаан алдагдлыг хэмжиж, дата мэдээлэл цуглууллаа. Хайлааст орчим бол агаарын чанарын индексээрээ +400 буюу "Маш их бохирдолтой" үзүүлэлттэй гардаг хотын утааны голомтот хэсгүүдийн нэг. Иймд эхлээд агаарын бохирдол ихтэй хэсэгтээ төвлөрч ажлаа эхлүүлснээр ирэх өвөл тодорхой үр дүнг харах зорилготой. Утааг бууруулах ажилд төрөөс бүхнийг шийдэж, төсвөөс их мөнгө зарцуулахын оронд иргэд хамтдаа том үр дүн гаргаж чадна гэдгийг ирэх өвөл энэ ажил харуулна.