2.7 ФРОМИЛТЭЙ СОГТУУ ЖОЛООЧИЙН ЯЛЫГ ХӨНГӨРҮҮЛСЭН ШИЙДВЭРЭЭ ДЭЭД ШҮҮХ ЭРГЭЖ ХАРАХ УУ

Өөрийгөө хянах чадваргүй, тодруулбал 2.7 бүхэл /фромиль/-тэй согтуу жолооч урсгал сөрж, зам тээврийн ноцтой осол гаргасан хэргийн талаар бид өмнө мэдээлж байсан. Тодруулбал, уг осолд өртсөн өндөр настан жил орчим хугацаанд ухаангүй, байнгын асаргаанд байгаа, бага насны хоёр хүүхэд, нэг эмэгтэй эрүүл мэндээрээ ноцтой хохироод байгааг хохирогчтой ярилцан хүргэсэн юм.

Хохирогчдын байдал одоо ч хэвээрээ байна. Асуудлын гол нь согтуу жолоочид анхан болон давж заалдах шатны шүүхээс 3 жилийн ял оноож, 36 сая төгрөгийн хохирол барагдуулах шийдвэр гаргасан. Гэвч Улсын дээд шүүх шүүгдэгчийн ялыг нэг жилээр хөнгөрүүлэн шийдвэрлэсэн байдаг. Ингэхдээ хохирогч нарыг болоод тэдний өмгөөлөгчийг оролцуулалгүй, хэлэлгүйгээр шүүх хурал явуулсанд хохирогч тал гомдолтой байгаа юм. Тиймээс Улсын дээд шүүхийн Ерөнхий шүүгчид өргөдлөө гаргаад байгаа юм байна.

Ерөнхий шүүгч өргөдлийг хянаж үзээд, Дээд шүүхийн шийдвэрийг эргэж харах шүүх хурал дахин болох эсэхийг шийдэх аж. Тус хариу энэ долоо хоногт гарах юм байна. Өөрөөр хэлбэл, согтуу жолоочийн ялыг хөнгөрүүлсэн шүүгч нарынхаа шийдвэрийг эргэж харах уу, тэр чигээр нь үлдээх үү гэдэг нь энэ долоо хоногт тодорхой болох нь.