Сураггүй алга болоод 20 хоносон хүү ээжтэйгээ утсаар холбогдон “эсэн мэнд яваагаа” хэлжээ

Иргэн Ж.Лхагважавын хүү Энх-Өлзий 2019 оны аравдугаар сарын 28-ны өдөр ээжийнхээ ажлаас буюу Баянзүрх дүүргийн 14 дүгээр хороонд байрладаг "Нарт өргөө" хотхоны 65 дугаар байрны дөрөвдүгээр орцноос 13.00 цагт гарч явснаасаа хойш ор сураггүй алга болжээ. Хүүгийн ээж түүнийг алга болсныг Цагдаагийн газарт бүртгүүлж, эрэн сурвалжлуулж, хүүгийн зурагт хуудсыг хотын гудамжаар наасан боловч сураг гаралгүй 20 хоног өнгөрөөд байв. Тэгвэл цагдаагийн байгууллагынхан хүүгийн сургийг гаргаж, PC тоглоомын газраар явж байгааг нь тогтоожээ.

Цагдаагийн байгууллагаас хүүгийн сургийг гаргасан аж. Тодруулбал, хүү дээрх хугацаанд PC тоглоомын газраар хэсч байсан бөгөөд /2019.11.19/ –ны өдөр ээждээ эсэн мэнд гэдгээ дуулгасан байна.

Энэ талаар Нийслэлийн цагдаагийн газрын Хүүхдийг гэмт хэргээс урьдчилан сэргийлэх хэлтсийн дарга, цагдаагийн хурандаа Б.Батзориг "Баянзүрх дүүргийн цагдаагийн хэлтэст ар гэрээс нь хүсэлт тавьсны дагуу эрэн сурвалжилж байгаа. Сүүлд ирсэн мэдээллээр тухайн хүүхэд цахим тоглоомын газруудаар явж байгаа гэсэн мэдээлэл бий. Бид шалгалтын ажиллагааг үргэлжлүүлж байна. Одоогийн байдлаар хүү ээжтэйгээ утсаар холбогдон, эсэн мэнд яваагаа хэлсэн" гэлээ.