ДАНШИГИЙН ТАСАЛБАРЫГ НААДМЫН ӨГЛӨӨ ҮНЭГҮЙ ТАРААНА

Гурав дахь жилдээ зохион байгуулагдах гэж буй "Даншиг наадам-Хүрээ цам 2017" шашин соёлын наадмын талаар өнөөдөр НЗДТГ болон Гандантэгчинлэн хийдээс хамтран мэдээлэл хийсэн. Даншиг наадмын нээлт наймдугаар сарын 5-ны 11.00 цагт Төв цэнгэлдэх хүрээлэнд эхлэнэ. Наадмын арга хэмжээ хурал номын зан үйл болон, хурдан морь, хүчит бөхийн барилдаанаар таван өдөр үргэлжлэх юм.

Харин энэ жилийн наадмыг 3-4 мянган гадаадын жуулчин ирж, үзэж сонирхоно гэсэн мэдээлэл байгаа аж. Даншиг наадмын тасалбарыг наадам эхлэх өдөр үнэ төлбөргүй тараах ажээ. Тиймээс иргэдийг тасалбарт заасан дугаарын дагуу суудалдаа суухыг зохион байгуулагчид хурлын үеэр уриалж байлаа.

Түүнчлэн энэ жилийн Даншиг наадмаар 256 бөхийн барилдаан болно. Барилдаан наймдугаар сарын 5-нд 13.00 цагт Төв цэнгэлдэх хүрээлэнд эхэлнэ. Харин наадмын хаалтын арга хэмжээ 2017.08.06-нд 19.00 цагт болж, түрүүлж, үзүүрлэсэн бөхчүүдэд шагнал гардуулах юм байна.