​ХӨСҮТ: Зах худалдааны төв орохдоо амны хаалт зүүхийг анхааруулав

ХӨСҮТ-өөс томуу, томуу төст өвчний нөхцөл, менингококкт халдварын зөвлөмж, бусад халдварт өвчин, мpox-сармагчны цэцэг өвчний талаар  Вирус судлалын тасгийн эрхлэгч, доктор Ц.Наранзул, ХӨСҮТ-ийн нэгжийн дарга Н.Сувдмаа нар дараах мэдээлэл хийлээ. 

Шинжилгээнд хамрагдсан хүмүүсээс зургаан төрлийн эмгэг төрүүлэгч илэрсэн. Вирусын тархалт нэмэгдсэн нь сургуулийн хичээл эхэлсэнтэй холбоотой реновирус, амьсгалын замын синцитиал вирусын халдвар түлхүү байгаа гэв. Боко вирус нийт шинжилгээний 8 хувиас, томуугийн вирус 5 хувьтай байжээ. 

Энэ оны  тухайд амьсгалын замын халдвараар бүх насныхан өвджээ. Гэхдээ тав хүртэл насныхан нийт халдвар авсан иргэдийн дунд хамгийн их байна. 10 мянган хүн ам тутамд 8 хүн томуу, томуу төст халдвар авчээ. Дөрвөн аймагт халдвар идэвхтэй, бусад аймгуудад алаг цоог байгаа талаар мэдээлэв. Тус төвөөс халдвар идэвхтэй илэрч буй аймгуудын эрүүл  мэндийн байгууллагууд руу зөвлөмж хүргүүлжээ. 

Вирус бүр өөрийн онцлогтой. 2-оос бага насны хүүхдүүд синцитиал илүүтэй өвдөж, хатгаа, улмаар ларангит болдог. Мөн ахмадууд энэ вируст өртөмхий.

Харин хоолой аргаж байгаа бол реновирусын хүндрэл юм. Чих, хамар, хоолойг илүүтэй өвтгөнө. Гэр бүлийн, ажлын байрны  орчинд, сургуульд гэх мэт оронд олон хүнийг нэг дор өвтгөдөг. Бохир гараар нүдээ нухах, хүүхдийнхээ ам хамрыг цэвэрлэх үед энэ вирус дамждаг байна. 

Томуугийн А хүрээний H1N вирусын халдвар авбал хоолой өвдөнө, удаан явцтай. Эмчид хандахгүй бол хоёрдогч бактерийг авч, хүндрэх эрсдэлтэй болохыг анхааруулав. Амны хаалтаа байнга зүүх нь  халдвараас гадна тоосжилтоос хамгаалана гэж сануулав. 

Менингококкийн хувьд 2007, 2019 онд манай улсад олон хүн өвчилсөн. 1-5-р саруудад халдвар бүртгэгддэг. Гуравдугаар сард хамгийн их халдвар гарчээ. Учир нь энэ сард олон баяр болдог. Энэ жилийн Цагаан сарын баяр болоход 14 хоног үлдлээ. Баярын бэлтгэл эхэлж, зах худалдааны төвүүд хүн ихтэй байна. Эдгээр газрууд руу явахдаа амны хаалт зүүгхийг анхааруулав.

Цэцэрлэг, сургуулиуд, албан байгууллагууд хоёр цаг тутамд агаараа сэлгэх хэрэгтэй. Тан зовуур илэрвэл эмчид хандаж, ялган оношлуулах шаардлагатай. Улирал хооронд хүний дархлаа сулардаг тул дархлаагаа сайн дэмжиж хувцсаа тохируулан өмсөх хэрэгтэй. Асран хамгаалагчид хүүхдээ заавал малгай өмсүүлж хэвшүүлэхийг зөвлөв.