Нүд нь гэмтэж, идээлсэн эмэгтэй эмнэлгийн байгууллагад хандсанаар гэр бүлийн хүчирхийллийн хэрэг шалгагдаж эхэлжээ

Хэнтий аймгийн Батноров суманд амьдардаг 50 настай эмэгтэйн баруун нүд гэмтсэн, идээлж, бугласан байдалтай эмнэлгийн байгууллагад ханджээ. 

Гэмтлийн шалтгааныг тогтоохоор цагдаагийн байгууллага уг хэргийг шалгаж байгаа бөгөөд хохирогчийг эмэгтэйчүүдийн эрхийг хамгаалах өдөр буюу гуравдугаар сарын 8-ны өдөр нөхөр нь болох 62 настай Б согтуурсан үедээ зодож, гэмтээсэн байж болзошгүй гэх гомдлын дагуу хэрэг үүсгэн шалгаж байгаа юм байна.
Уг гомдол гуравдугаар сарын 19-ний өдөр цагдаагийн байгууллагад ирсэн бөгөөд хохирогч бэртэл авснаасаа хойш арав гаруй хоног эмнэлэг болон цагдаагийн байгууллагад мэдэгдэлгүй байснаас ийнхүү идээлж, буглажээ. Тэрбээр Улаанбаатарт ирж, эмнэлгийн тусламж авч байгаа юм байна. 

Хохирогчийн тухайд “нөхөр маань зодоогүй. Би өөрөө юм мөргөчихсөн юм” зэргээр тайлбар хэлж байгаа ч бусад гэрчүүдийн мэдээллээр хэргийг шалгаж байгаа аж. 

Энэ мэт ахуйн хүрээнд архи согтууруулах ундаа хэрэглэснээс үүдэн нэгнийхээ эрүүл мэнд, амь насанд хохирол учруулах хэрэг гарсаар байна. Иймд өндөржүүлсэн бэлэн байдлын үед ахуйн хүрээнд олуулаа цуглан архи согтууруулах ундаа хэтрүүлэн хэрэглэхгүй байхыг сануулж байна.