СЕЛФИ ХИЙЖ БАЙГАА НЬ ШИЛЭН ДЭЭР НЬ ОЙЧИХСОН БАЙХАД Л "БИ СЕЛФИДЭЭГҮЙ"

Өнөөдрийн нийгмийн сүлжээн дэх "Од" нь Нийслэлийн засаг даргын шинэхэн орлогч Д.Мөнхжаргал байлаа. Тодруулбал, НЗД-ын Агаарын чанарын асуудал хариуцсан төслийн удирдагчаар томилогдоод, өнгөрсөн баасан гарагт ажлаа авч, шинэ өрөөндөө тухалсан эрхэм хатагтай байв.

Олон нийтийн шүүмжлэлийн бай болсон шалтгаан нь дүрэлзэн асч буй түймрээр фоно хийж сэлфидсэн явдал. Ард нь улаан гал дүрэлзэж, аймшигт хар утаа суунаглаж, гал унтраагчид болоод иргэд үймэн бужигнаж байхад НЗД-ын орлогч сэлфидээд зогсож байх нь хэр зохимжтой болоод ёсзүйтэй вэ?

Энэ асуултыг өөрөөс нь тодруулахаар манай сэтгүүлч түүний шинэхэн албан өрөөнд очсон ч тэрбээр бас л нэгэн гамшиг, гал түймрийн асуудлаар хуралдаж явна гэсэн тул утсаар тайлбар авсан юм.

Тэрбээр "Сошиал орчинд шүүмжлээд байгаа зураг бол сэлфи биш, ойроос авсан зураг. Энэ зургийг манай туслахууд аваад, миний фэйсбүүкт оруулчихсан байна лээ. Миний бэйсбүүкийг манай туслахууд ажиллуулдаг" гэсэн юм. Түүнчлэн "Хүмүүсийн шүүмжлээд байгааг хүлээн авч байна. гэхдээ би тэнд ажлаа л хийж явсан. Иргэд гал түймрээс сэргийлэх хэрэгтэй" гэгчлэн огт өөр зүйлсийг үргэлжлүүлэн ярьсаар байсан юм.