Ц.НЯМДОРЖ: Д.ГАНТУЛГААС ӨӨР ЯЛЛАГДАГЧААР ТАТАГДСАН НЭГ ГИШҮҮН БИЙ

Өнөөдрийн байнгын хорооны хуралдааны үеэр ХЗДХ-ийн сайд Ц.Нямдорж Д.Гантулга гишүүнээс өөр нэг УИХ-ын гишүүн яллагдагчаар татагдчихаад байна хэмээн ноцтой мэдээлэл хийлээ. Тэрээр ярихдаа “Д.Гантулгын асуудлыг хамгаалаад байгаа зүйл байхгүй. Хуулийн асуудалд бодитой хийдэл үүсчхээд байна. Дахиад яллагдагчаар татагдчихсан нэг гишүүний асуудал явагдаж байна. Тэр чинь орж ирэхийг үгүйсгэхгүй ээ" гэв. УИХ-ын гишүүн Д.Гантулга УИХ-аас түдгэлзэх хүсэлтээ өгөөд байгаа ч хуулийн мухардалд орчхоод байгаа юм. Тиймээс өнөөдөр Д.Лүндээжанцан гишүүн УИХ-ын гишүүн Д.Гантулгын түдгэлзэх саналыг шийдэхийн тулд УИХ-ын тухай хуульд өөрчлөлт оруулаад Засгийн газраас санал авахаар хүргүүлсэн билээ.

Сайд Ц.Нямдоржийн өгсөн мэдээллийн мөрөөр бид УИХ-ын гишүүн Д.Муратыг яллагдагчаар татагдсан байж болзошгүй гэж үзээд эх сурвалжуудаас тодруулахад яллагдагчаар татаагүй байна гэсэн юм. . Харин нэгэн УИХ-ын гишүүн тээврийн хэрэгсэл жолоодож яваад автомашины осол гаргаж бусдын амь насанд хүрсэн хэрэг шалгагдаж буй. Тухайн осол гаргасан УИХ-ын гишүүнийг яллагдагчаар татсан байх магадлалтай гэлээ.