Хавдар судлалын үндэсний хоёрдугаар төвд ажиллах эмч нарыг АНУ-д сургана

Монгол Улсын Ерөнхийлөгч У.Хүрэлсүх захирамж гарган, Хавдар судлалын үндэсний хоёрдугаар төвийг барихад дэмжлэг үзүүлэх ажлын хэсэг байгуулсан байна. Өнөөдөр Ерөнхийлөгч У.Хүрэлсүх тэргүүтэй ажлын хэсгийн ахлагч, ахлах зөвлөх Н.Хүрэлбаатар, Эрүүл мэндийн сайд Т.Мөнхсайхан, Сангийн сайд Б. Жавхлан нарын бусад ажлын хэсгийн гишүүдийн хамт Хавдар судлалын үндэсний хоёрдугаар төв баригдах хэсэг буюу Сонгинохайрхан дүүргийн 34 дүгээр хороо, Баянголын аманд ажиллалаа.

Нийт 15 газарт, 95 мянган м.кв талбай бүхий тус төвийн дэд бүтцийг барихад шаардагдах хөрөнгийг энэ оны улсын төсөвт тусгасан бөгөөд барилгыг 2-3 жилийн дотор барьж дуусгахаар зорьж байгаа юм. Мөн тус төвд ажиллах 1,500 эмч, ажиллагсдыг ирэх сараас АНУ-ын Ютагийн их сургуультай хамтран шатлалтайгаар сургаж эхлэхээр болжээ.

Хавдрын шалтгаант нас баралт нийт нас баралттай харьцуулахад дэлхийд 17 хувьтай байхад манай Улсад 24 хувьтай төдийгүй, хорт хавдраар өвдсөн иргэдийн 70 орчим хувь нь хожуу шатандаа оношлогддог.